Вторник, 23.10.2018, 18:33
Приветствую Вас, Гость

  Мин, Наахара 7 кылаастаах оскуолатыгар үлэлии сырыттахпына, Тиэлиги начальнай оскуолатыгар оскуола сэбиэдиссэйинэн анаабыттара. Онно 1952 сылтан 1961 сылга диэри үлэлээбитим.

  1952-1953 сс. педколлективка Дьяконова Анна Дмитриевна, Соколова Ольга Дмитриевна буолан үһүөн үлэлээбиппит. Үөрэнээччи ахсаана 42 оҕо этэ, интернакка  12 оҕо олороро. Иитээччилэринэн учууталларбыт Анна Дмитриевна, Ольга Дмитриевна үлэлээбиттэрэ.

  Үөрэх-иитии үлэтигэр нуучча тылын кабинета тэриллибитэ. Оройуоҥҥа начальнай оскуола иккис кабинета этэ. Соколова А.Д. Горьковскай уобаластан үөрэҕи саҥа бүтэрэн кэлбитэ. 3 сыл бииргэ олорбуппут кэннэ дьоно ыалдьаннар, дойдутугар төннүбүтэ. Учуутал быһыытынан олус кыһамньылааҕа, оҕолор сөбүлүүллэрэ. Атын уруокка олорон, нуучча тылын уруогун кэтэһэр буолаллара. Пионербаһаатай быһыытынан мэлдьи оҕолору кытта сылдьара, хайыһардьыт этэ. "Правда” колхоз чиэһин көмүскүүрэ. 1954 с начальнай оскуола пионердара кэтэхтэн хайыһар күрэхтэһиилэригэр (республикаҕа  600-н тахса начальнай оскуола баара) кыайыылааҕынан тахсан, кубок ылбыппыт.

  1954-1955 сылларга үөрэх бүтүүтэ начальнай оскуолалар   фестиваллара буолбута. Бу фестивальга оскуолабыт парад оформлениятыгар, формаҕа иккис миэстэни ылбыта. Ырыаҕа, үнкүүгэ ордук үчүгэйдэринэн Саввинова Аля, Тимофеева Рая, Платонова Рая о.д.а. ааттаналлара. Дуобакка Денисов Миша иккис миэстэ буолара.

  1955-56 үөрэх дьылыгар Травникова Серафима Матвеевна Ярославскай уобаластан эмиэ үөрэҕи саҥа бүтэрэн кэлбитэ. Эмиэ баьаатайдаабыта, нуучча тылын үөрэтэрэ. Ити сыл кыһын комсоиольскай тэрилтэ секретаря Кириллин В.В. көмөтүнэн оскуола олбуорун иһигэр хаарынан карусель онорбуттара. Онно махтанан "Пионерскай правда” хаһыакка заметка ыыппыттара. Захарова Ираҕа, Сивцев Ваняҕа хаһыат редакциятыттан махтал сурук кэлбитэ. Оттон араас союзнай республикалартан "Пионердар комсомольскай тэрилтэни кытары шефтэһиигит хайдаҕый?”- диэн күҥҥэ 5-6 суругу туталлара.

  Бу кэмҥэ  оскуола коллектива "Төрөппүт университета” диэн лекторийы тэрийэн ыйга биирдэ төрөппүттэргэ педагогическай темаларга дакылаат оҥорор этибит. Онно концертаах эбэтэр пионерскай сбордаах буоларбыт. Төрөппүт комитета үчүгэйдик үлэлиирэ, уруокка активнайдык сылдьаллара. Пионердар колхоз 12 ньирэйин шефтэһэн уочаратынан көрөллөрө. Өссө оскуола таһынааҕы учаастак үлэлиирэ. Онно сайын оҕолор иккитэ уу куталлара, төрөппүт комитета хонтуруоллуура. Учаастакка огурсу, моркуоп, луук ыһарбыт. Биир сыл оройуон быыстапкатыгар кыттыбыппыт. Мин үлэлээбит кэммэр "Артек” лааҕырга биир миэстэ кэлбитигэр Харитонов Афоняны, учууталлар бэйэбит харчылаан, таҥаһын үксүн интернаттан тэрийэн ыыппыппыт. Кини аҥардас ийэлээҕэ, харчы суох кэмэ этэ. Ити сылларга үөрэммит оҕолортон билигин Харитонов А., Денисов М., Саввин А., Тимофеева Р. уо.д.а. үрдүк үөрэҕи бүтэрэн, дьоҥҥо-сэргэҕэ биллэр, ытыктанар үлэһиттэр буола сылдьаллар.

Варвара Карпова, педагогическай үлэ ветерана 

Министерство образования Республики Саха (Якутия)  Институт развития образования и повышения квалификации Республики Саха (Якутия)  Республиканский центр дополнительного образования и гражданско-патриотического воспитания  Институт национальных школ Республики Саха (Якутия)  Федеральный портал поддержки ЕГЭ  Федеральные государственные образовательные стандарты  Федеральный образовательный портал  Российский общеобразовательный портал  Единая коллекция цифровых образовательных ресурсов  Федеральный центр информационно-образовательных ресурсов  Единое окно доступа к образовательным ресурсам  Всероссийский Интернет-педсовет  ИД Первое сентября